စာချုပ်သစ်သက်တမ်းတိုးပြီးနောက်ပရိတ်သတ်တွေ ကျေနပ်စေမယ့် ကတိမျိုး ပေးသွားခဲ့တဲ့ ကာဗာနီ

ယူနိုက်တက် အသင်းကတော့ ယနေ့မှာ အသင်းရဲ့ ဝါရင့်တိုက်စစ်မှုးကြီး အက်ဒီစင် ကာဗာနီ ကို နောက်ထပ် တစ်နှစ် သက်တမ်းတိုး စာချုပ် ချုပ် ဆိုသွားခဲ့ပါတယ်။
ဒါ့ကြောင့် ဒီရာသီမှာ ၃၂ ပွဲပါ၀င်ကစားထားပြီး ၁၅ ဂိုးသွင်းကာ ၂ ဂိုးဖန်တီးပေးထားသူ ကာဗာနီဟာ လာမယ့် ၂၀၂၂ ခုနှစ် ဇွန်လအထိ ယူနိုက်တက် မှာဆက်ရှိနေတော့မှာလည်း ဖြစ်ပါတယ်။ကာဗာနီ က စာချုပ်သစ် ချုပ်ဆိုပြီး ချိန်မှာ ၎င်းရဲ့ ပရိတ်သတ်တွေကို ပျော်ရွင်မှု တွေပေးစွမ်းနိုင် ဖို့ အကောင်းဆုံး ဆက်လက်ကြိုးစားသွားမှာ ဖြစ်တယ် လို့ ကတိပေးသွားခဲ့ပီး အသင်းဖေါ်တွေနဲ့ ပရိတ်သတ်တွေက သူ့ကို ဆက်နေစေခြင်တယ်လို့ ခံစားရတာကြောင့် အသင်းမှာ ဆက်နေဖြစ်တယ်ဆိုတဲ့ အကြောင်း ကို ဖွင့်ဟ သွားခဲ့ပါတယ်။ ကာဗာနီက

“အသင်းဖော်တွေနဲ့ကျနော့်ကြား၊ ဒီနေရာကနောက်ကွယ်မှာအလုပ်လုပ်နေကြတဲ့ဝန်ထမ်းတွေနဲ့ကျနော့်ကြားမှာ နက်ရှိုင်းတဲ့ဆက်နွယ်မှုတစ်ခုရှိနေတယ်လို့ ကျနော်ခံစားမိတယ်။ ဒီလူတွေဟာ ကျနော့်ကို နေ့တိုင်းလိုလိုတက်ကြွမှုတွေပေးနေတဲ့ပုဂ္ဂိုလ်တွေပါ။ ကျနော်တို့အားလုံးအတူတူပေါင်းစည်းပြီး ထူးခြားတဲ့အောင်မြင်မှုေတွကိုအရယူနိုင်ပါတယ်””ကျနော်ဒီကိုစရောက်လာတဲ့အချိန်ကတည်းက ကျနော့်အပေါ်ထားတဲ့နည်းပြရဲ့ယုံကြည်မှုကိုခံစားမိတယ်။ ကစားသမားတစ်ယောက်အတွက်တော့ နည်းပြရဲ့ဒီလိုယုံကြည်မှုမျိုးဆိုတာ ကိုယ့်ရဲ့အကောင်းဆုံးပုံစံကိုပြနိုင်မယ့်အကောင်းဆုံးအခွင့်အရေးတစ်ရပ်ပါပဲ။ ဒီအတွက်လည်း နည်းပြကိုကျနော်ကျေးဇူးတင်ပါတယ်”

“ပရိသတ်ပေါင်းများစွာက ကျနော့်ကိုဒီမှာဆက်နေစေချင်သေးတာကိုသိရတဲ့အတွက် ကျနော်ဝမ်းသာတယ်။ သူတို့အတွက်ပျော်ရွှင်မှုဆိုတာကိုဆောင်ကျဥ်းပေးနိုင်ဖို့ ကျနော့်ဘက်ကဘာမဆိုပေးဆပ်သွားမှာပါ။ ကွင်းထဲကကျနော့်ရဲ့ခြေစွမ်းတွေနဲ့လည်း သူတို့ကိုပျော်အောင်ထားမှာပါ။ အိုးလ်ထရက်ဖို့ဒ်ကပရိသတ်တွေအရှေ့မှာ အခုထိ ကျနော်မကစားဖူးသေးဘူး။ ဒီအခွင့်အရေးကိုလည်းကျနော်မေစာင့်နိုင်တော့ပါဘူး”ဟု ပြောကြားသွားခဲ့ပါတယ်။

• 

ဇူလိုင်(၁)ရက်နေ့ကနေ စတင်ပြီး ဘာစီလိုနာအသင်းနဲ့ ချုပ်ဆိုထားတဲ့ စာချုပ်သက်တမ်း ကုန်ဆုံးသွားခဲ့ရပြီး Free Agent ကစားသမားတစ်ယောက် ဖြစ်သွားခဲ့ရတဲ့ လီယွန်နယ်မက်ဆီကို ဥရောပထိပ်တန်း ကလပ်အသင်းတွေများစွာကနေ ခေါ်ယူချင်နေကြပေမယ့်လည်း မက်ဆီရဲ့ လုပ်ခလစာ မြင့်မားလွန်းမှုကြောင့်ရော ကစားသမားကိုယ်တိုင်ကပါ ဘာစီလိုနာအသင်းမှာသာ သူရဲ့ဘောလုံးသမားဘဝကို ဆက်လက်ဖြတ်သန်းချင်နေတာကြောင့်ပါ မက်ဆီကို အခြားကလပ်အသင်းတွေမှာထက် ဘာစီလိုနာမှာပဲ ဆက်လက်မြင်တွေ့ရဖို့က ရာခိုင်နှုန်း ပိုများနေရတာဖြစ်ပါတယ်။

ဘာစီလိုနာအသင်းဘက်ကလည်း သူတို့ရဲ့ အဓိက ကစားသမား မက်ဆီကို အလွတ်ပြောင်းရွှေ့ကြေးနဲ့ လုံးဝလက်မလွတ်သွားချင်ပဲ အသင်းမှာသာ ဆက်လက်ထိန်းသိမ်းထားချင်နေတာကြောင့် သက်တမ်းတိုးနိုင်ဖို့ကို အစွမ်းကုန် ကြိုးပမ်းလျက် ရှိနေပါတယ်။ ဒါပေမယ့် ဘာစီလိုနာအသင်းဟာ ကိုရိုနာဗိုင်းရပ်စ်ဂယက်ကြောင့် အသင်းရဲ့ စီးပွားရေးက ထိခိုက်နေရတဲ့အပြင် အသင်းကနေ ကစားသမားတွေအတွက် လစာပေးချေရမှာလည်း လာလီဂါကနေ သတ်မှတ်ထားတဲ့ ပမာဏထက် (၄၀)%ကျော်တောင် ကျော်လွန်နေတာဖြစ်လို့ မက်ဆီကို သက်တမ်းတိုးနိုင်ရေးရော ခေါ်ယူထားတဲ့ ကစားသမားသစ်တွေကို လာလီဂါမှာ စာရင်းသွင်းနိုင်ရေးမှာပါ အခက်အခဲ ကြုံတွေ့နေရပါတယ်။

ဒီလို အခြေအနေတွေနဲ့ ရင်ဆိုင်နေရချိန်မှာ ဘာစီလိုနာအသင်းဟာ အသင်းမှာ နေရာသိပ်မရတဲ့ လစာမြင့် ကစားသမားတွေကို အသင်းကနေ ရောင်းထုတ်သွားဖို့ စီစဉ်လာခဲ့တဲ့အပြင် အသင်းအတွက် အရေးပါနေသေးတဲ့ စီနီယာကစားသမားတွေဖြစ်တဲ့ ဂျော်ဒီအယ်ဘာ ဆာဂျီရောဘတ်တို ဆာဂျီဘူးစကတ်စ်နဲ့ ဂျရတ်ပီကေးတို့ကိုပါ လက်ရှိရရှိနေတဲ့ လုပ်ခလစာပမာဏထက် ရာခိုင်နှုန်းအနည်းငယ်ခန့် လျှော့ယူပေးဖို့အထိပါ အကူအညီတောင်းထားတယ်လို့ သိရှိရပါတယ်။ ပြီးခဲ့တဲ့ ရက်ပိုင်းအတွင်း ထွက်ပေါ်လာခဲ့တဲ့ သတင်းတွေမှာတော့ ဘာစီလိုနာအသင်းဟာ မက်ဆီကို စာချုပ်သက်တမ်းတိုးဖို့ သဘောတူညီမှု ရယူနိုင်ခဲ့ပြီဖြစ်ပြီး မက်ဆီကလည်း သူရဲ့ယခင်လစာကို (၅၀)%အထိ လျှော့ယူသွားမှာဖြစ်သလို အသင်းနဲ့ (၅)နှစ်အထိ သက်တမ်းတိုးမယ်လို့ ဖော်ပြခဲ့ကြပါတယ်။ ဒါပေမယ့် လစာထက်ဝက်ခန့် လျှော့ယူမယ်ဆိုရင်တောင် မက်ဆီအတွက် အသင်းကနေ တစ်ပတ်ကို ပေါင်(၁.၂)သန်းအထိ ပေးချေရဦးမှာဖြစ်လို့ အခုလို လစာမြင့် ကစားသမားတွေအနေနဲ့ လစာလျှော့ယူပေးဖို့ ဘာစီလိုနာဘက်ကနေ အကူအညီတောင်းခံထားရတာ ဖြစ်ပါတယ်။

• 

နောက်ဆုံးရ အပြီးသတ် အပြောင်းအရွှေ့သတင်းများ

ပြီးခဲ့တဲ့ ဘောလုံးရာသီတုန်းက လီဗာပူးလ်အသင်းကနေ ပေါ်တိုအသင်းဆီမှာ အငှားနဲ့ သွားရောက်ကစားခဲ့တဲ့ ဆာဘီးယား ကွင်းလယ်ကစားသမား မာကိုဂရုဂျစ်ဟာ ဒီနှစ်နွေစျေးကွက်အတွင်းမှာပဲ ပေါ်တိုအသင်းဆီကို ယူရို(၁၂)သန်းနဲ့ အပြီးသတ် ပြောင်းရွှေ့သွားခဲ့ပါတယ်။

ပရီးမီးယားလိဂ်ပြိုင်ပွဲဆီကို တန်းတတ်လာခဲ့တဲ့ ဘရန့်ဖိုဒ့်အသင်းဟာ ဒိန်းမတ်ကလပ် မစ်ဂျေးလန်းအသင်းရဲ့ နိုင်ဂျီးရီးယား ကွင်းလယ်ခံစစ်ကစားသမား ဖရန့်အွန်ယီကာကို ပြောင်းရွှေ့ကြေး ယူရို(၁၀)သန်းခန့်နဲ့ ခေါ်ယူခဲ့ပြီး (၅)နှစ်စာချုပ် ချုပ်ဆိုသွားခဲ့ပါတယ်။

ခရစ္စတယ်ပဲလေ့စ်အသင်းနဲ့ စာချုပ်သက်တမ်း ကုန်ဆုံးခဲ့ပြီးနောက် အသင်းလက်မဲ့ ဖြစ်နေရတဲ့ ဝေးလ်စ် ဝါရင့်ဂိုးသမားကြီး ဝိန်းဟန်နက်ဆီကို ဘန်လေအသင်းကနေ အလွတ်ပြောင်းရွှေ့ကြေးနဲ့ ခေါ်ယူနိုင်ခဲ့ပြီး (၂)နှစ်စာချုပ်ချုပ်ဆိုသွားခဲ့ပါတယ်။

ဆယ်ကျော်သက်အရွှယ် လူငယ်ကစားသမားလေးတွေကို နေရာပေးလေ့ရှိတဲ့ ဘွန်ဒစ်လီဂါ ထိပ်သီးကလပ်အသင်းကြီး ဒေါ့မွန်အသင်းဟာ ပီအက်စ်ဂျီ လူငယ်အသင်းရဲ့ (၁၆)နှစ်အရွှယ် ဂါနာကွင်းလယ်ကစားသမားလေး အဒူလာယီကာမာရာကို အလွတ်ပြောင်းရွှေ့ကြေးနဲ့ ခေါ်ယူလိုက်ပြီ ဖြစ်ပါတယ်။

• 

ပြီးခဲ့တဲ့ ဘောလုံးရာသီတုန်းက အသင်းဟောင်း စပါးအသင်းမှာ တစ်ရာသီအငှားနဲ့ လာရောက်ကစားခဲ့တဲ့ ဝေးလ်စ်တောင်ပံကစားသမားကြီး ဂါရတ်ဘေးလ်ဟာ လက်ရှိအချိန်မှာ သူရဲ့အငှားစာချုပ်က ပြည့်မြောက်သွားခဲ့ပြီဖြစ်လို့ မူလကလပ်အသင်းဖြစ်တဲ့ ရီးယဲလ်မက်ဒရစ်အသင်းကို ပြန်လည်ရောက်ရှိနေပြီဖြစ်သလို ရီးယဲလ်အသင်းကလည်း သူနဲ့အဆင်မပြေ ဖြစ်နေတဲ့ နည်းပြဇီဒန်း ကိုင်တွယ်နေတာ မဟုတ်တော့ပဲ သူ့ကို ရီးယဲလ်အသင်းဆီ ခေါ်ဆောင်ခဲ့တဲ့ နည်းပြအန်စလော့တီ ကိုင်တွယ်နေတာဖြစ်လို့ ဘေးလ်အနေနဲ့ လာမယ့်ရာသီမှာတော့ ရီးယဲလ်မှာသာ ဆက်လက်ရှိနေလိမ့်မယ်လို့ AS ကနေ ဖော်ပြလာခဲ့ပါတယ်။

အသက်(၃၂)နှစ်အရွှယ်ရှိ ဝေးလ်စ်လက်ရွေးစင် တောင်ပံတိုက်စစ်ကစားသမား ဘေးလ်ဟာ ရီးယဲလ်အသင်းမှာ နည်းပြဟောင်း ဇီဒန်းနဲ့ ဆက်ဆံရေး အဆင်မပြေမှုတွေ ရှိနေတာဖြစ်လို့ ပြီးခဲ့တဲ့ ဘောလုံးရာသီမှာပဲ သူရဲ့အသင်းဟောင်း စပါးအသင်းဆီကို အငှားနဲ့ သွားရောက်ကစားခဲ့ရပြီး စပါးအတွက် ပြိုင်ပွဲစုံပွဲပေါင်း (၃၄)ပွဲ ပါဝင်ကစားခဲ့ကာ သွင်းဂိုးပေါင်း (၁၆)ဂိုးအထိကို သွင်းယူနိုင်ခဲ့ပါတယ်။ အသင်းဟောင်းဆီ တကျော့ပြန် ရောက်လာခဲ့တဲ့ ဘေးလ်ဟာ စပါးမှာ အထိုက်အလျောက် ခြေစွမ်းပြနိုင်ခဲ့ပေမယ့်လည်း သူရဲ့လစာမြင့်မားမှုကြောင့် စပါးဘက်ကနေ နောက်တစ်ရာသီ ထပ်မငှားနိုင်တော့ပဲ ရီးယဲလ်အသင်းဆီကိုသာ ပြန်လည်စေလွှတ်ခဲ့ရပါတယ်။

ဘေးလ်ဟာ လာမယ့် ၂၀၂၂ခုနှစ်မှာပဲ ရီးယဲလ်အသင်းနဲ့ စာချုပ်သက်တမ်း ကုန်ဆုံးသွားတော့မှာဖြစ်ပေမယ့် ကစားသမားကိုယ်တိုင်က သူရဲ့ဆရာသမား အန်စလော့တီလက်အောက်မှာ ပါဝင်ကစားချင်နေသလို အန်စလော့တီကိုယ်တိုင်ကလည်း ဘေးလ်ကို အသင်းမှာပဲ ဆက်လက်ရှိနေစေချင်လို့ လာမယ့် ဘောလုံးရာသီအတွင်းမှာတော့ ဘေးလ်ကို ရီးယဲလ်အသင်းမှာသာ ဆက်လက်မြင်တွေ့ရလိမ့်မယ်လို့ စပိန်သတင်းစာ AS က ဖော်ပြလာခဲ့ပါတယ်။ ဒါပေမယ့် လူငယ်ခြေတတ် ကစားသမားလေးတွေကို ခေါ်ယူသွားဖို့ ပြင်ဆင်လျက်ရှိနေတဲ့ ရီးယဲလ်အသင်းဟာ တစ်နှစ်သာ စာချုပ်သက်တမ်း ကျန်ရှိနေတော့တဲ့ ဂါရတ်ဘေးလ်ကို သက်တမ်းတိုးသွားတော့မှာမဟုတ်ပဲ စာချုပ်ပြည့်ချိန်မှသာ အလွတ်ပြောင်းရွှေ့ကြေးနဲ့ လက်လွတ်သွားဖွယ် ရှိနေပါတယ်။ ဒါပေမယ့် ကိုဗစ်ကြောင့် စီးပွားရေး အထိနာထားရတဲ့ ရီးယဲလ်အသင်းဟာ ဘေးလ်အတွက် ဆက်လက်ပေးချေရဦးမယ့် လစာကို အနည်းငယ်လျှော့ချသွားချင်နေပြီး ဒီကိစ္စသာ အဆင်မပြေ ဖြစ်ခဲ့မယ်ဆိုရင်တော့ ဒီနှစ် နွေစျေးကွက်မှာပဲ ဘေးလ်နဲ့ ရီးယဲလ်အသင်းတို့ လက်တွဲဖြုတ်သွားရနိုင်ပါတယ်။

• 

အခုနှစ်ရဲ့ နွေရာသီ အပြောင်းအရွှေ့စျေးကွက်အတွင်းမှာ လိုင်ယွန်အသင်းကနေ ဘာစီလိုနာအသင်းဆီကို အလွတ်ပြောင်းရွှေ့ကြေးနဲ့ ပြောင်းရွှေ့ရောက်ရှိလာခဲ့တဲ့ နယ်သာလန် တိုက်စစ်ကစားသမား မန်ဖစ်ဒီပိုင်းက သူရဲ့တိုက်စစ်ကစားဟန်ကြောင့် အသင်းသစ် ဘာစီလိုနာမှာ အံ့ဝင်အောင် ကစားနိုင်မယ်လို့ ယုံကြည်လျက်ရှိနေပြီး အသင်းနဲ့အတူ ဆုဖလားအောင်မြင်မှုများစွာကိုပါ ရယူသွားနိုင်ဖို့ ကြိုးစားသွားမယ်လို့ ထုတ်ဖော်ပြောဆိုလာခဲ့ပါတယ်။

အသက်(၂၇)နှစ်အရွှယ်ရှိ နယ်သာလန်လက်ရွေးစင် တိုက်စစ်ကစားသမား ဒီပိုင်းဟာ ပီအက်စ်ဗွီလူငယ်အသင်းကနေ ပေါ်ထွက်လာခဲ့သူဖြစ်ပြီး မန်ချက်စတာယူနိုက်တက်အသင်းမှာလည်း (၂)နှစ်နီးပါး ပါဝင်ကစားခဲ့သူလည်း ဖြစ်ပါတယ်။ ယူနိုက်တက်မှာ အံ့မဝင်နိုင်ခဲ့တဲ့ ဒီပိုင်းဟာ ၂၀၁ရခုနှစ်မှာပဲ လိုင်ယွန်အသင်းကို ပြောင်းရွှေ့ခဲ့ရပြီး လိုင်ယွန်မှာတော့ သူရဲ့အကောင်းဆုံးပုံစံကို ပြန်လည်ရရှိခဲ့သလို အသင်းခေါင်းဆောင်အဖြစ်ပါ တာဝန်ပေးခံခဲ့ရပါတယ်။ ဒါပေမယ့် လိုင်ယွန်မှာ (၄)နှစ်ဝန်းကျင်လောက် ပါဝင်ခဲ့ပြီးတဲ့နောက်မှာ သူရဲ့နယ်သာလန်နည်းပြဟောင်း ရော်နယ်ကိုးမန်းရှိရာ ဘာစီလိုနာအသင်းဆီကို ပြောင်းရွှေ့လာခဲ့ပါတယ်။

ဘာစီလိုနာအသင်းဆီ ပြောင်းရွှေ့ခွင့်ရရှိခဲ့တာနဲ့ပတ်သက်ပြီး ဒီပိုင်းက “ဘာစီလိုနာအသင်းဆီကို ပြောင်းရွှေ့ခွင့် ရရှိခဲ့တဲ့နေ့က တကယ့်ကို ထူးခြားတဲ့ နေ့ရက်တစ်ရက်ပါပဲ။ ဒီအသင်းနဲ့ ဒီအသင်းရဲ့အိမ်ကွင်းကြီးဆီကို သွားရောက်ရဖို့အတွက် ကျွန်တော် အရမ်းကို စိတ်လှုပ်ရှားနေခဲ့ရတယ်။ အဲ့ဒီနေ့က မြင်မြင်သမျှ အရာအားလုံးက လှပနေသလိုပါပဲ။ တကယ့်ကို ထူးခြားတဲ့ နေ့ရက်လေးတစ်ရက်ပါပဲ။ ကျွန်တော်က ကမ္ဘာပေါ်မှာ ထိပ်တန်းအဆင့်ရှိနေတဲ့ ကလပ်အသင်းကြီးဆီကို ရောက်ရှိလာခဲ့တာဖြစ်လို့ ဒီအသင်းနဲ့အတူ ဆုဖလားတွေများစွာ ရယူနိုင်ဖို့ မျှော်လင့်ထားပါတယ်။ ဘာစီလိုနာအသင်းက သမိုင်းကြောင်းကောင်းခဲ့တဲ့ အသင်းကောင်တစ်သင်း ဖြစ်သလို လက်ရှိမှာလည်း ထိပ်တန်းအသင်းတစ်သင်း ဖြစ်နေပါသေးတယ်။ ကျွန်တော်လည်း အနားယူလို့ ပြီးဆုံးသွားပြီဆိုတော့ အခုအချိန်က လာမယ့်ဘောလုံးရာသီအတွက် ပြန်လည်အာရုံစိုက်ရတော့မယ့် အချိန်ပါ။ ဘာစီလိုနာအသင်းနဲ့အတူ ကျွန်တော်ရဲ့ ပွဲဦးထွက်ရာသီကို အကောင်းဆုံး တာထွက်ချင်ပါတယ်။ ဒီအတွက်ကိုလည်း ကျွန်တော် အသေအချာလေး အာရုံစိုက်ထားပါတယ်။ လာလီဂါမှာလည်း ခပ်မြန်မြန် အထိုင်ကျနိုင်အောင် ကျွန်တော်ကြိုးစားသွားပါမယ်” လို့ စပိန်နာမည်ကျော် သတင်းစာကြီး Mundo Deportivo နဲ့ အင်တာဗျူးအတွင်းမှာ ပြောဆိုလို့သွားခဲ့ပါတယ်။

• 

ပြီးခဲ့တဲ့ ဘောလုံးရာသီက ပြင်သစ်လီဂူးကလပ် နိုက်စ်အသင်းကနေ ချယ်လ်ဆီးအသင်းဆီကို အလွတ်ပြောင်းရွှေ့ကြေးနဲ့ ပြောင်းရွှေ့ရောက်ရှိလာခဲ့ပြီး ချက်ချင်းဆိုသလို ပေါ်တိုအသင်းကို တစ်ရာသီအငှားနဲ့ ထပ်မံပြောင်းရွှေ့ခဲ့ရတဲ့ နောက်ခံကစားသမားလေး မာလန်ဆားက လက်ရှိအချိန်မှာ ချယ်လ်ဆီးအသင်းဆီကို ပြန်လည်ရောက်ရှိလာခဲ့ပြီဖြစ်ကာ အသင်းမှာ ပုံမှန်နေရာရလာဖို့အတွက် အကောင်းဆုံး ကြိုးပမ်းသွားမယ်လို့ ထုတ်ဖော်ပြောဆိုလိုက်ပါတယ်။

အသက်(၂၂)နှစ်အရွှယ်ရှိ ပြင်သစ်လူငယ် နောက်ခံကစားသမားလေး မာလန်ဆားဟာ နိုက်စ် လူငယ်အကယ်ဒမီကနေ ပေါ်ထွက်လာခဲ့တာဖြစ်ပြီး ပြီးခဲ့တဲ့နှစ်ကမှ နိုက်စ်နဲ့ စာချုပ်သက်တမ်း ကုန်ဆုံးခဲ့လို့ ချယ်လ်ဆီးအသင်းဆီကို အလွတ်ပြောင်းရွှေ့ကြေးနဲ့ ရောက်ရှိလာခဲ့တာဖြစ်ပါတယ်။ ဒါပေမယ့် ချယ်လ်ဆီးက မာလန်ဆားကို အသင်းမှာ ချက်ချင်းအသုံးပြုသွားဖို့ ဆန္ဒမရှိသေးတဲ့အတွက် ပွဲထွက်ခွင့်တွေ ရရှိရအောင် ပေါ်တိုအသင်းဆီ တစ်ရာသီ အငှားချခဲ့ပြီး ဆားက ပေါ်တိုမှာ ပြိုင်ပွဲစုံ (၁၉)ပွဲအထိ ပါဝင်ကစားခွင့် ရခဲ့ပါတယ်။ အခုတော့ မာလန်ဆားဟာ ပေါ်တိုနဲ့ အငှားစာချုပ် ပြည့်သွားခဲ့လို့ ချယ်လ်ဆီးအသင်းဆီ ရောက်ရှိလာခဲ့ပြီဖြစ်ကာ ပီတာဘရော့နဲ့ ခြေစမ်းခဲ့တဲ့ ခြေစမ်းပွဲစဉ်မှာလည်း ပါဝင်ကစားခဲ့ရပါတယ်။

ချယ်လ်ဆီးအသင်းကို ပြန်လည်ရောက်ရှိလာခဲ့တာနဲ့ပတ်သက်ပြီး ဆားက “ကျွန်တော် ဒီကို ရောက်ရှိနေတာ အရမ်းဝမ်းမြောက်မိပါတယ်။ အလုပ်တွေလည်း စလုပ်နေပြီ။ အသင်းသား အားလုံးကလည်း ကြိုးစားအားထုတ်နေကြတာ ပျော်စရာကောင်းပါတယ်။ နည်းပြကလည်း ပြင်သစ်လို ပြောနိုင်ဆိုနိုင်တတ်သူဖြစ်လို့ ကျွန်တော်နဲ့သူ စကားစမြည်တွေ ပြောဖြစ်ခဲ့ပါသေးတယ်။ ဒီမှာ ရှိနေရတဲ့ စိတ်ခံစားချက်က အရမ်းကောင်းနေတယ်။ အသင်းသားအားလုံးနဲ့လည်း ဆက်ဆံရေးကောင်းတွေလည်း ရှိနေပါတယ်။ ဒီမှာ ရှိနေတဲ့ ကစားသမားတွေကလည်း ရည်မှန်းချက်ကိုယ်စီ ရှိနေကြသူတွေချည်းပဲဆိုတာ ကျွန်တော်ခံစားသိမိတယ်။ ကျွန်တော်ကတော့ အသင်းနဲ့ ပူးပေါင်းခွင့်ရဖို့နဲ့ အသင်းကို အကောင်းဆုံး ကူညီပေးနိုင်ဖို့ မျှော်လင့်ထားပါတယ်။ အသင်းက မနှစ်ရာသီမှာ ဥရောပရဲ့ဘုရင်အဖြစ်နဲ့ ရပ်တည်နိုင်ခဲ့တာဆိုတော့ ဒီရာသီမှာလည်း အမြင့်ဆုံးအဆင့်ထိ ရောက်ရှိနိုင်အောင် အစွမ်းကုန် ကူညီပေးသွားချင်ပါတယ်။ အသင်းမှာ ပါဝင်ခွင့်ရဖို့လည်း ကြိုးစားသွားမယ်။ အသင်းရော ကျွန်တော်ပါ ရည်မှန်းချက် မြင့်မားကြတာဖြစ်လို့ ဒါက အလိုက်ဖက်ဆုံး အနေအထား ဖြစ်လာမှာပါ” လို့ ပြောဆိုသွားခဲ့ပါတယ်။

• 

ပြီးခဲ့တဲ့ ယူရို-၂၀၂ဝပြိုင်ပွဲမှာ ချန်ပီယံဖြစ်ခဲ့ရတဲ့ အီတလီလက်ရွေးစင်အသင်းနဲ့အတူ ခြေစွမ်းပြသနိုင်ခဲ့တဲ့ တိုက်စစ်ကစားသမား လော်ရန်ဇိုအင်ဆစ်ဂနီကို အီတလီထိပ်သီး ကလပ်အသင်းများစွာအပြင် ပရီးမီးယားလိဂ်က စပါးအသင်းကနေလည်း ခေါ်ယူသွားဖို့ စိတ်ဝင်စားလျက် ရှိနေတာကြောင့် နာပိုလီအသင်းကနေ သူတို့ရဲ့ ကစားသမားအတွက် ပြောင်းရွှေ့ကြေးကို ယူရိုသန်း(၃၀) သတ်မှတ်ထားတယ်လို့ Corriere Dello Sport ကနေ ဖော်ပြလာခဲ့ပါတယ်။

အသက်(၃၀)အရွှယ်ရှိ အီတလီလက်ရွေးစင် တိုက်စစ်ကစားသမား အင်ဆစ်ဂနီဟာ ၂၀၀၆ခုနှစ်ကတည်းက နာပိုလီ လူငယ်အကယ်ဒမီကနေ ပေါ်ထွက်လာခဲ့တာဖြစ်ပြီး စီနီယာအသင်းအတွက် ပွဲထွက်မကစားရခင် အီတလီကလပ်အသင်း (၃)သင်းမှာ အငှားနဲ့ သွားရောက်ကစားခဲ့ပါသေးတယ်။ အငှားကစားသမားဘဝနဲ့ (၃)နှစ်နီးပါးလောက် ကျင်လည်ခဲ့ပြီးတဲ့နောက်မှာ အင်ဆစ်ဂနီဟာ ၂၀၁၂ခုနှစ်နောက်ပိုင်း နာပိုလီအသင်းကြီးမှာ ပါဝင်ကစားခဲ့ရပြီး အခုဆို အသင်းရဲ့ အဓိက ကစားသမားတစ်ယောက်လည်း ဖြစ်နေရသလို အသင်းခေါင်းဆောင်တာဝန်ကိုပါ ရယူထားနိုင်တာဖြစ်ပါတယ်။

နာပိုလီအသင်းနဲ့အတူ ကိုပါအီတလီယာဖလား(၂)ကြိမ် အီတလီစူပါဖလား (၁)ကြိမ် ရယူနိုင်ခဲ့တဲ့ အင်ဆစ်ဂနီဟာ ဒီနှစ်အတွင်းမှာလည်း သူရဲ့ အီတလီလက်ရွေးစင်အသင်းနဲ့ပါ ယူရို-၂၀၂ဝပြိုင်ပွဲအတွင်း အကြီးမားဆုံး အောင်မြင်မှုကြီးတစ်ခုကို ရယူနိုင်ခဲ့ပြီး ကလပ်အသင်းများစွာရဲ့ စိတ်ဝင်စားခြင်းကိုပါ ရရှိလာခဲ့ပါတယ်။ လက်ရှိ အင်ဆစ်ဂနီဟာ နာပိုလီအသင်းနဲ့ စာချုပ်သက်တမ်းက တစ်နှစ်ပဲ ကျန်ရှိနေတော့တာဖြစ်ပြီး အသင်းက သက်တမ်းတိုးချင်နေပေမယ့် ကစားသမားဘက်ကတော့ ကစားသမားဘဝကနေ အနားမယူခင်မှာ ဆယ်စုနှစ်တစ်ခုကျော် ဖြတ်သန်းခဲ့တဲ့ နာပိုလီကနေ ထွက်ခွာပြီး စိန်ခေါ်မှုအသစ်တွေကို ရှာဖွေချင်တာကြောင့် အသင်းပြောင်းချင်နေတာ ဖြစ်ပါတယ်။ ဒီလို အနာဂတ် အခြေအနေ လှုပ်ခတ်လျက်ရှိနေတဲ့ အင်ဆစ်ဂနီကို လာဇီယို အေစီမီလန် အင်တာမီလန်တို့လို စီးရီးအေ ထိပ်တန်းကလပ်အသင်းတွေကနေ စိတ်ဝင်စားနေသလို ပရီးမီးယားလိဂ် ထိပ်သီးကလပ် စပါးအသင်းကပါ ပစ်မှတ်ထားလို့နေပါတယ်။ ဒီလို အသင်းများစွာရဲ့ ပစ််မှတ်ဖြစ်နေတဲ့ အင်ဆစ်ဂနီကို နာပိုလီအသင်းဘက်ကနေ ပြောင်းရွှေ့ကြေး ယူရိုသန်း(၃၀)ဝန်းကျင် သတ်မှတ်လို့ထားပြီး နာပိုလီဘက်က သူတို့ရဲ့ စီးရီးအေပြိုင်ဘက်အသင်းတွေထက် စပါးလို ပြည်ပလိဂ်က ကလပ်အသင်းတွေဆီကိုပဲ ရောင်းချသွားချင်နေတာ ဖြစ်ပါတယ်။

• 

ယနေ့ညမှာ ယှဉ်ပြိုင်ကစားမယ့် ရီးရဲလ်မက်ဒရစ် ဂန္တဝင်အသင်းနဲ့ ဘာစီလိုနာ ဂန္တဝင်အသင်းတို့ရဲ့ ခြေစမ်းပွဲ အတွက် လက်မှတ်တွေ အားလုံးနီးပါး ရောင်းကုန်သွားပြီလို့ သိရပါတယ်။ အဆိုပါ ခြေစမ်းပွဲကို အစ္စရေးလ်နိုင်ငံမှာ ကျင်းပသွားမယ်လို့ သိထားရပြီး ပွဲစဉ်ကနေ ရရှိလာတဲ့ ငွေကြေးတွေ အားလုံးကို ပြန်လည် လှူဒါန်းသွားမှာပဲ ဖြစ်ပါတယ်။

အခုချိန်မှာတော့ ရီးရဲလ်မက်ဒရစ် ဂန္တဝင် ကစားသမားတွေနဲ့ ဘာစီလိုနာ ဂန္တဝင် ကစားသမားတွေဟာ ပွဲအတွက် အစ္စရေးလ်နိုင်ငံကို ရောက်ရှိနေကြပြီး ပွဲမတိုင်မီ ပျော်ရွှင်စွာ နှုတ်ဆက်နေကြတာကိုလည်း မြင်တွေ့ရပါတယ်။

“Football is a beautiful game” ❤️❤️❤️

• 

ဒီနှစ်ရဲ့ နွေစျေးကွက်အတွင်းမှာ တိုက်စစ်ကစားသမားသစ်တွေကို ခေါ်ယူသွားဖို့ စီစဉ်လျက်ရှိနေတဲ့ ချယ်လ်ဆီးအသင်းဟာ သူတို့အလိုရှိနေတဲ့ ကစားသမားတွေရဲ့ တန်ကြေးတွေက မြင့်မားလွန်းနေတဲ့အတွက် အသင်းမှာ ခြေစွမ်းပြဖို့ ရုန်းကန်နေရတဲ့ ဂျာမနီ တိုက်စစ်ကစားသမား တီမိုဗာနာကိုပါ အသင်းကနေ ပြန်လည်ရောင်းချပြီး အသုံးစရိတ် ပြန်ရှာသွားဖွယ် ရှိနေတယ်လို့ Sky Sports Germany ကနေ ဖော်ပြလာခဲ့ပါတယ်။

အသက်(၂၅)နှစ်အရွှယ်ရှိ ဂျာမန်လက်ရွေးစင် တိုက်စစ်ကစားသမား ဗာနာဟာ ပြီးခဲ့တဲ့ နွေစျေးကွက်ကမှ လိုက်က်ဇစ်ကနေ ချယ်လ်ဆီးအသင်းဆီကို ပြောင်းရွှေ့လာခဲ့တာဖြစ်ပေမယ့် အသင်းဟောင်း လိုက်ပ်ဇစ်အသင်းနဲ့ နောက်ဆုံးကစားခဲ့တဲ့ ဘောလုံးရာသီအတွင်းမှာ သွင်းဂိုးစုစုပေါင်း (၃၄)ဂိုးအထိ သွင်းယူနိုင်ခဲ့တဲ့ ဗာနာဟာ အခုအသင်းသစ် ချယ်လ်ဆီးမှာတော့ သူရဲ့သွင်းဂိုးက (၁၂)ပဲ ရှိနေခဲ့ရတဲ့အထိ ဂိုးသွင်းစွမ်းရည် ကျဆင်းနေခဲ့ရပါတယ်။ ဒါကြောင့် ချယ်လ်ဆီးဘက်က အခု နွေစျေးကွက်အတွင်း တိုက်စစ်မှူးသစ် ခေါ်ယူသွားဖို့ ပြင်ဆင်နေတဲ့အပြင် အသင်းမှာ သွင်းဂိုးတွေ သွင်းယူဖို့ ရုန်းကန်နေရတဲ့ ဗာနာကိုပါ ပြန်လည်ရောင်းချသွားချင်နေတာဖြစ်ပါတယ်။

အပြောင်းအရွှေ့စျေးကွက် စတင်ချိန်ကတည်းက ဗာနာရဲ့ အနာဂတ် အခြေအနေတွေက လှုပ်ခတ်လာခဲ့ရပြီး ရီးယဲလ်မက်ဒရစ်အသင်းနဲ့ ကောလာဟလတွေ ထွက်ပေါ်ခဲ့သေးသလို ဒေါ့မွန်တိုက်စစ်မှူး အာလင်းဟာလန်းကို ကမ်းလှမ်းရာမှာလည်း အပြောင်းအရွှေ့ရဲ့ တစိတ်တပိုင်းအဖြစ် ဗာနာကို ထည့်သွင်းကမ်းလှမ်း သွားလိမ့်မယ်ဆိုတဲ့ သတင်းတွေဟာလည်း ဒီရက်ပိုင်းမှာ ထွက်ပေါ်လာခဲ့ပါတယ်။ အခုလို ထွက်ပေါ်နေတဲ့ သတင်းတွေနဲ့ပတ်သက်ပြီး ကစားသမားရဲ့ အေးဂျင့်ဖြစ်သူကနေ ငြင်းဆန်ထားခဲ့ပေမယ့် အသင်းဘက်ကတော့ သူတို့ အလိုရှိနေတဲ့ တိုက်စစ်ကစားသမားတွေဖြစ်တဲ့ အာလင်းဟာလန်း ခီယေဇာ ဟာရီကိန်း ကင်စလေကိုးမန်း ဂျက်ဂရီးလစ်ရှ်တို့ထဲက ကစားသမား(၂)ယောက်ခန့်လောက်ကို ခေါ်ယူသွားနိုင်ဖို့အတွက် အသင်းနဲ့ ပွဲဦးထွက်ရာသီမှှာ ထင်သလောက် ခြေစွမ်းမပြနိုင်ခဲ့တဲ့ ဗာနာကို ပြန်လည်ရောင်းချချင်နေပါတယ်။ ချယ်လ်ဆီးအသင်းဟာ လက်ရှိအချိန်ထိ နွေစျေးကွက်အတွင်း ကစားသမားသစ် ခေါ်ယူမှုတွေ မပြုလုပ်နိုင်သေးပဲ အသင်းက ကစားသမားတွေဖြစ်တဲ့ ဂျရူး မော့ဆက် တိုမော်ရီ ဗန်ဂျင်ဂယ် ဂယ်လ်မော်တို့ကိုသာ အသင်းကနေ ရောင်းချထား အငှားချထားခဲ့ပါတယ်။

• 

ဒဏ်ရာပြသာနာကြောင့် ကာလရှည်ကြာ အနားယူနေရာကနေ ပြန်လည်သက်သာလာခဲ့ပြီး အင်္ဂလန်အသင်းနဲ့အတူ ယူရို-၂၀၂ဝပြိုင်ပွဲအတွင်းမှာပါ ပါဝင်ကစားနိုင်ခဲ့သေးတဲ့ ကွင်းလယ်ကစားသမား ဂျော်ဒန်ဟန်ဒါဆန်ကို လီဗာပူးလ်အသင်းဘက်ကနေ စာချုပ်သစ်တစ်ရပ် ချုပ်ဆိုသွားဖို့ စီစဉ်နေခဲ့ပေမယ့်လည်း လက်ရှိအချိန်ထိ ဘာမှထူးခြားလာခြင်း မရှိပဲ သက်တမ်းတိုးမယ့် အခြေအနေတွေ ရှုပ်ထွေးလျက် ရှိနေတာကြောင့် ကစားသမားရဲ့ အနာဂတ် အခြေအနေတွေပါ လှုပ်ခတ်လာနေခဲ့တယ်လို့ The Athletic ကနေ ဖော်ပြလာခဲ့ပါတယ်။

အသက်(၃၁)နှစ်အရွှယ်ရှိ အင်္ဂလန်လက်ရွေးစင် ကွင်းလယ်ကစားသမား ဟန်ဒါဆန်ဟာ ဆန်းဒါးလန်းလူငယ်အသင်းကနေ ပေါ်ထွက်လာခဲ့သူဖြစ်ပြီး ၂၀၁၁ခုနှစ်မှာပဲ ဆန်းဒါးလန်းကနေ လီဗာပူးလ်အသင်းဆီကို ပြောင်းရွှေ့ရောက်ရှိလာခဲ့တာဖြစ်ပါတယ်။ လီဗာပူးလ်ကနေ စတီဗင်ဂျရတ် ထွက်ခွာသွားခဲ့တဲ့ ၂၀၁၅ခုနှစ်ကနေစတင်ပြီး အသင်းခေါင်းဆောင် တာဝန်ကိုပါ လွှဲပြောင်းရရှိခဲ့တဲ့ ဟန်ဒါဆန်ဟာ လီဗာပူးလ်အသင်းနဲ့အတူ ချန်ပီယံလိဂ်ဖလား (၁)ကြိမ် ပရီးမီးယားလိဂ်ဖလား (၁)ကြိမ် ဥရောပစူပါဖလားနဲ့ ဖီဖာကလပ်ကမ္ဘာ့ဖလားတို့ (၁)ကြိမ်စီ ပိုင်ဆိုင်နိုင်ခဲ့ကာ အသင်းကို အကောင်းဆုံး မောင်းနှင်နိုင်ခဲ့တဲ့ ကစားသမားတစ်ဦးလည်း ဖြစ်ပါတယ်။

လက်ရှိ အသင်းမှာ အဓိက ကွင်းလယ်လူတစ်ဦးဖြစ်တဲ့ နယ်သာလန် ကွင်းလယ်ကစားသမား ဝိုင်နယ်ဒန်လည်း ထွက်ခွာသွားခဲ့ပြီ ဖြစ်တာကြောင့် အသင်းအတွက် အရေးပါလှတဲ့ အသင်းခေါင်းဆောင် ဟန်ဒါဆန်ကို လီဗာပူးလ်ဘက်ကနေ သက်တမ်းတိုးချင်နေတာဖြစ်ပါတယ်။ လာမယ့် ၂၀၂၃ခုနှစ်မှာ အသင်းနဲ့ စာချုပ်သက်တမ်း ကုန်ဆုံးသွားတော့မယ့် ဟန်ဒါဆန်ကို လီဗာပူးလ်အသင်းဘက်ကရော အသင်းပိုင်ရှင်တွေကပါအစ စာချုပ်သက်တမ်းတိုးဖို့ ဆန္ဒရှိနေပေမယ့်လည်း The Athletic ရဲ့ ဖော်ပြချက်မှာတော့ အသင်းနဲ့ ကစားသမားရဲ့ကြား သက်တမ်းတိုးမယ့် ကိစ္စရပ်က လုံးဝပျက်သွားခြင်းမရှိပဲ ဆက်လက်လုပ်ဆောင်နေလျက် ရှိနေပေမယ့် အခြေအနေတွေက ရှပ်ရှုပ်ထွေးထွေးတွေ ဖြစ်နေတာကြောင့် သက်တမ်းတိုးနိုင်ရေးက မရေမရာ ဖြစ်နေရတယ်လို့ သိရပါတယ်။ ဒီလို အခြေအနေတွေ ရှိနေတဲ့ ဟန်ဒါဆန်ဟာ ကလပ်အသင်းတချို့နဲ့ပါ အပြောင်းအရွှေ့သတင်းတွေ ချက်ချင်းထွက်ပေါ်လာခဲ့သလို လီဗာပူးလ်အသင်းကလည်း ဒီနွေစျေးကွက်အတွင်း ကွင်းလယ်ပိုင်းကို အင်အားဖြည့်တင်းသွားဖို့က အဓိက ဦးစားပေးကိစ္စ ဖြစ်လာခဲ့ရပါတယ်။

•