Football Italia သတင်းမီဒီယာရဲ့ ဖော်ပြချက်တွေအရ လာမယ့် ၂၀၂၂-၂၀၂၃ ဘောလုံးရာသီနေကစတင်ပြီး အီတလီစီးရီးအေ ပြိုင်ပွဲအတွင်း စီးရီးအေကလပ်အသင်းတွေအနေနဲ့ အိမ်ကွင်းအဝေးကွင်း ဂျာစီတွေကို အစိမ်းရောင်သုံးစွဲခွင့် တားမြစ်သွားတော့မှာဖြစ်ပြီး တကယ်လို့ အစိမ်းရောင်ပါတဲ့ ဂျာစီကို ဝတ်ဆင်မယ့် ကလပ်အသင်းတွေ ရှိလာခဲ့မယ်ဆိုရင်တော့ ကြီးလေးတဲ့ ပြစ်ဒဏ်တွေ ချမှတ်သွားဖွယ် ရှိနေတယ်လို့ သိရှိရပါတယ်။
ကလပ်အသင်းတွေအနေနဲ့ အိမ်ကွင်း ဒါမှမဟုတ် အဝေးကွင်းဂျာစီတွေကို အစိမ်းရောင်အသားပေး ဝတ်ဆင်တဲ့အခါ ပွဲစဉ်တွေကို တီဗီရုပ်သံလိုင်းကနေ ထုတ်လွှင့်ပြသစဉ်အတွင်း အသင်းတွေ ဝတ်ဆင်ထားတဲ့ အစိမ်းရောင်နဲ့ ဘောလုံးကွင်းက မြက်ခင်းပြင်အရောင်ကြား ရောရောနှောနှော ဖြစ်နေရတဲ့အတွက် တီဗီကနေ ကြည့်ရှုရသူတွေ အဆင်မပြေ ဖြစ်နေရတဲ့အတွက် လာမယ့်ဘောလုံးရာသီကနေ စတင်ပြီး အစိမ်းရောင်ဂျာစီ ဝတ်ဆင်ခြင်းကို တားမြစ်လိုက်ရတာ ဖြစ်တယ်လို့ သိရှိရပါတယ်။
ဒီလို သတ်မှတ်ချက်တွေကြောင့် အိမ်ကွင်းဂျာစီအဖြစ် အစိမ်းရောင်နဲ့အမည်းရောင်တွေကို ရောစပ်ဝတ်ဆင်တတ်တဲ့ စီးရီးအေကလပ် ဆာဆူအိုလိုအသင်းအနေနဲ့ ဒီရာသီမှာပဲ အဆိုပါဝတ်စုံကို နောက်ဆုံးအကြိမ်အဖြစ် ဝတ်ဆင်ရတော့မှာဖြစ်ပြီး ၂၀၂၂-၂၀၂၃ ရာသီမှာတော့ သူတို့ရဲ့ဂျာစီအရောင်ကို လုံးဝပြောင်းလဲရတော့မှာ ဖြစ်ပါတယ်။ ဒါပေမယ့် ဆာဆူအိုလိုတစ်သင်းတည်းမဟုတ်ပဲ တစ်ခါတစ်လေမှာ အစိမ်းရောင်ဂျာစီ ဝတ်ဆင်တတ်တဲ့ အတ္တလန်တာအသင်းနဲ့ အဝေးကွင်းဂျာစီကို အစိမ်းရောင်အဖြစ် ဝတ်ဆင်တတ်တဲ့ လာဇီယိုအသင်းတွေအနေနဲ့လည်း ဒီစည်းမျဉ်းကို လိုက်နာသွားရတော့မှာဖြစ်ပါတယ်။ ထုတ်ပြန်ထားတဲ့ စည်းမျဉ်းတွေအရ စီးရီးအေအသင်းတွေအနေနဲ့ အကျီကိုသာမကပဲ ဘောင်းဘီနဲ့ ခြေအိတ်တွေကိုလည်း အစိမ်းရောင် အသာပေးလွန်းတာမျိုး ဝတ်ဆင်ခြင်းမပြုရလို့ သတ်မှတ်ထားတာဖြစ်ပြီး စည်းကမ်းမလိုက်နာရင် အမှတ်လျော့တဲ့အထိ အပြစ်ပေးဖွယ် ရှိနေပါတယ်။ ၂၀၂၁-၂၀၂၂ ဘောလုံးရာသီ အီတလီစီးရီးအေပြိုင်ပွဲကိုတော့ လာမယ့်သြဂုတ်လ (၁၃)ရက်နေ့မှာ စတင်သွားမှာဖြစ်ပြီး လာမယ့် ၂၀၂၂နှစ် မေလ(၂၂)ရက်နေ့မှာ အဆုံးသတ်မှာဖြစ်တယ်လို့ သိရပါတယ်။
